माइतीघरमा तनाव, प्रधानमन्त्री बालेनविरुद्ध नाराबाजी

नेकपा (एमाले)का नेता–कार्यकर्ताले शनिबार (चैत १४) काठमाडौंको माइतीघरलगायत स्थानमा विरोध प्रदर्शन गरेका छन् । एमाले अध्यक्ष केपी शर्मा ओलीलाई प्रहरीले गिरफ्तार गरेपछि उनीहरू सडकमा उत्रिएका हुन् ।

माइतीघरमा प्रदर्शनमा उत्रिएका एमाले कार्यकर्ता र प्रहरीबीच तनावको स्थिति छ । हात हालाहालसम्मको अवस्था देखिएको छ । ठूलो संख्यामा प्रहरी परिचालन गरिएको छ ।

प्रदर्शनमा उत्रिएका एमाले कार्यकर्ताले वर्तमान सरकारविरुद्ध नाराबाजी गरेका छन् । उनीहरूले प्रधानमन्त्री बालेन्द्र शाह (बालेन)विरुद्ध पनि नारा लगाएका छन् । प्रदर्शनका कारण सवारीसाधनको आवागमन प्रभावित भएको छ ।

शनिबारै बिहान प्रहरीले पूर्वप्रधानमन्त्री ओली र तत्कालीन गृहमन्त्री एवं नेपाली कांग्रेसका नेता रमेश लेखकलाई भक्तपुरस्थित उनीहरूका निवासबाट नियन्त्रणमा लिएको छ ।