कोरोना संक्रमणबाट चितवनमा १ सहित थप ४ को मृत्यु

आश्विन–२०, २०७७

चितवन । भरतपुरको चितवन मेडिकल कलेजमा उपचाररत कोरोना संक्रमित एक वृद्धाको मृत्यु भएको छ ।

निमोनिया र श्वासप्रश्वासबाट समस्या भइ यही असोज १६ गते अस्पतालमा भर्ना भएकी कावासोती नगरपालिका ५ का ७७ वर्षीया वृद्धाको आज विहान मृत्यु भएको अस्पतालले जनाएको छ ।

उता मोरङको विराटनगरस्थित नोबेल मेडिकल कलेजमा दुई जनाको मृत्यु भएको छ ।

मृत्यु हुनेमा रतुवामाई नगरपालिका –८ का ४५ वर्षीय र कानेपोखरी गाउँपालिका–६ का ५० वर्षीय पुरुष रहेका छन् । कानेपोखरीका पुरूष ब्लड क्यान्सरबाट पीडित थिए भने रतुवामाईका पुरूषमा मधुमेहको समस्या थियो ।

त्यस्तै धरानस्थित बीपी कोइराला स्वास्थ्य विज्ञान प्रतिष्ठानमा उपचरारत धरान–३ का ६४ वर्षीय पुरुषको पनि आज विहान मृत्यु भएको छ । उनी गत असोज १२ गते संक्रमण पुष्टि भएपछि अस्पताल भर्ना भएका थिए ।

योसँगै नेपालमा कोरोना संक्रमणवाट मृत्यु हुनेको संख्या ५ सय ५८ पुगेको छ।