युद्ध मच्चाइरहेका ट्रम्पलाई भेनेजुएलाकी नेतृ मारियाले सुम्पिइन् नोबेल शान्ति पुरस्कारको पदक

भेनेजुएलाकी विपक्षी नेता तथा नोबेल शान्ति पुरस्कार विजेता मारिया कोरिना माचाडोले अमेरिकी राष्ट्रपति डोनाल्ड ट्रम्पलाई आफ्नो नोबेल शान्ति पुरस्कारको पदक प्रस्तुत गरेको बताएकी छन् । बिहीबार ह्वाइट हाउसमा भएको निजी भेटमा उनले पदक दिएको जनाएकी छन् ।

भेटपछि माचाडोले यो दिन भेनेजुएलाली जनताका लागि ऐतिहासिक भएको बताउँदै ट्रम्पलाई स्वतन्त्रताप्रतिको प्रतिबद्धताका लागि सम्मानस्वरूप पदक दिएको उल्लेख गरिन् । तर, नोबेल समितिले पुरस्कार हस्तान्तरण गर्न नमिल्ने स्पष्ट पारेको छ ।

अमेरिकाले राष्ट्रपति निकोलस मादुरोलाई पक्राउ गरेपछि पनि ट्रम्प प्रशासनले माचाडोको नेतृत्वलाई समर्थन नगरी अन्तरिम सरकार प्रमुख डेल्सी रोड्रिगेजसँग सहकार्य गरिरहेको छ । यसैबीच, माचाडोले वासिङ्टन भ्रमणका क्रममा अमेरिकी सांसदहरूसँग भेटघाट पनि गरिन् ।

ट्रम्प प्रशासनले भेनेजुएलाको तेल क्षेत्र पुनर्संरचनामा तीव्र कदम चाल्दै पहिलोपटक ५० करोड डलर बराबरको तेल बिक्री सम्पन्न गरेको जनाएको छ । उता, रोड्रिगेजले अमेरिकासँग कूटनीतिक सम्बन्ध विस्तार गर्न आफू तयार रहेको संकेत दिएकी छन् ।