पाकिस्तानी मध्यस्थतामा अमेरिका-इरान युद्धविराम: दुई साताका लागि आक्रमण स्थगित

पाकिस्तानी नेतृत्वको सघन कूटनीतिक प्रयासपछि अमेरिका र इरान दुई साताका लागि युद्धविराम गर्न सहमत भएका छन् । अमेरिकी राष्ट्रपति डोनाल्ड ट्रम्पले इरानको ‘सभ्यता नै नामेट पारिदिने’ धम्की दिएको केही घण्टाभित्रै विकसित यो घटनाक्रमले तत्कालका लागि विश्व युद्धको भय टारेको छ।

इरानी सर्वोच्च नेता मोजतबा खामेनेईको अनुमतिपछि इरान युद्धविरामका लागि तयार भएको हो । इरानले यस सहमतिलाई आफ्नो ‘रणनीतिक जित’ का रूपमा व्याख्या गरेको छ । इरानी विदेशमन्त्री सैयद अब्बास अराघचीले इरानमाथिका आक्रमण रोकिए आफूहरू पनि लडाइँ रोक्न प्रतिबद्ध रहेको स्पष्ट पारेका छन् ।

यसअघि अमेरिकी राष्ट्रपति ट्रम्पले सामाजिक सञ्जाल ‘ट्रुथ सोसल’ मार्फत पाकिस्तानी प्रधानमन्त्री शहबाज शरीफ र सेना प्रमुख आसिम मुनिरको विशेष अपिलपछि आफूले आक्रमणको निर्णय थाती राखेको खुलासा गरेका छन् । उनले लेखेका छन्, “पाकिस्तानी प्रधानमन्त्री र सेना प्रमुखको आग्रहलाई सम्मान गर्दै म इरानमाथि दुई साताका लागि हमला रोक्न सहमत भएको छु ।”

सहमतिअनुसार इरानले विश्वको महत्त्वपूर्ण व्यापारिक मार्ग ‘होर्मुज’ बाट व्यापारिक जहाजहरूलाई सुरक्षित रूपमा आउजाउ गर्न दिनुपर्नेछ । यसअघि ट्रम्पले तोकिएको समयसीमाभित्र सहमति नभए इरानी सभ्यता नै कहिल्यै नफर्किने गरी समाप्त पारिदिने चेतावनी दिएका थिए ।

यसैबीच, इरान र अमेरिकाले युद्धविरामको घोषणा गरे पनि केही क्षेत्रमा तनाव कायम रहेको अन्तर्राष्ट्रिय सञ्चारमाध्यमले जनाएका छन्।