चितवनबाट काठमाडौका लागि छुटेको माइक्रोमा भेटियो बिना स्रोतको ९५ लाख

असोज ९,२०७८

चितवनको नारायणगडबाट काठमाडौका लागि छुटेको माइक्रोमा सवार दुइ जनाबाट ९५ लाख नेपाली रुपैयाँ बरामद भएको छ।

काठमाडौंको नागढुंगाबाट प्रहरीले ९५ लाख नेपाली रुपैयाँ बरामद गरेको हो ।

चन्द्रागिरी नगरपालिका–२ स्थित नागढुङ्गाको चेक प्वाइन्टबाट प्रहरीले भारतिय दुइ नागरिकलाइ सो नगद सहित पक्राउ गरेको हो । पक्राउ पर्नेमा भारत घर भएका सागर माली र कृष्ण अढाडे छन् ।

भारतको मुम्बई घर भएका उनीहरु ग १ ख ६६४५ नम्बरको हाइस माइक्रोमा चितवनबाट काठमाडौं जादै थिए । यात्रुबाहक माइक्रोको ८ र ९ नम्बर सिटमा बसेका उनीहरुको झोला चेकजाँच गर्दा सो नगद फेला परेको थियो ।
सो रकम अवैध हुन्डी कारोबारको हुनसक्ने प्रहरीले अनुमान गरेको छ । पैसा ल्याउनेहरूले स्रोत खुलाउन नसकेका कारण प्रहरीले थप अनुसन्धान गरिरहेको छ।

प्रहरीले २६ वर्षीय मालिको साथबाट ४५ लाख र कृष्ण अढाडेको साथबाट ५० लाख बरामद गरेको दाबि गरेको छ।