ओली पक्षबाट भिम रावल सहित ४ जना प्रदेश इन्चार्ज हटाइए

  • खबरदाता
  • पुष ०९, २०७७

पौष ९,२०७७
नेपाल कम्युनिस्ट पार्टी ओली समूहले प्रदेश इन्चार्जबाट प्रचण्ड-माधव नेपाल समूहका नेताहरूलाई हटाएको छ ।

बालुवाटारमा बसेको केन्द्रीय कमिटी बैठकले ओलीईतर पक्षका चार जनालाई प्रदेश इन्चार्जबाट मुक्त गरेको हो ।  बैठकले प्रदेश १ का इन्चार्ज भीम आचार्यलाई हटाउँदै सुवास नेम्वाङलाई नयाँ इन्चार्ज तोकेको छ ।

यस्तै बाग्मती प्रदेशकी अष्टलक्ष्मी शाक्यलाई कारबाही गर्दै ईश्वर पोखरेललाई इन्चार्ज तोकिएको छ । यता, कर्णाली प्रदेशमा जनार्दन शर्मालाई कारबाही गर्दै मणि थापालाई इन्चार्ज तोकिएको छ। यसै गरी, सुदूरपश्चिम प्रदेशका इन्चार्ज भीम रावल पनि कारबाहीमा परेका छन् । उनको ठाउँमा लेखराज भट्टलाई जिम्मेवारी दिइएको छ ।

प्रदेश २ मा ओली पक्षकै सत्यनारायण मण्डलले निरन्तरता पाएका छन् भने लुम्बिनी प्रदेशमा मुख्यमन्त्री रहेका शङ्कर पोखरेल र गण्डकीमा पनि मुख्यमन्त्री पृथ्वी सुब्बा गुरुङलाइनै निरन्तरता दिइएको छ ।

यसैबिच, ओली समूहको केन्द्रीय कमिटी बैठकले प्रचण्डमाथि पनि कारबाही गरेको छ । प्रचण्डलाई कारबाही स्वरूप कार्यकारी अध्यक्षबाट हटाउने प्रस्ताव केन्द्रीय कमिटीले अनुमोदन गरेको छ ।

प्रदेश इन्चार्जको जिम्मेवारी पाउने लेखराज भट्ट र मणि थापा पूर्व माओवादी हुन् । माओवादी खुला राजनीतिमा आए पछि असन्तुष्टि रहदै विदोह गरेका थापा पछि फेरी माओवादीमा फर्कीएका थिए ।

प्रकाशक

गृहनगर पब्लिकेसन प्रा.लि.,भरतपुर ,चितवन ,नेपाल.

फोन :- ९७७-५६५९४४४०

ईमेलः [email protected]

सूचना तथा प्रसारण बिभाग दर्ता नं.२०३७/०७७-७८