• फागुन १४, २०८०, सोमवार Monday, 26 February, 2024

डा.केसी र सरकारबीच सहमतिपछि अनसन तोडियो


डा.केसी र सरकारबीच सहमतिपछि अनसन तोडियो

आश्विन–२५, २०७७

चिकित्सा शिक्षा तथा स्वास्थ्य सेवा सुधारका विभिन्न ६ बुँदे माग राखेर २७ दिनदेखि आमरण अनसनमा बसेका डा गोविन्द केसी र सरकारबीच शनिबार राति सहमति भएको छ ।

डा केसी पक्ष र सरकारी वार्ता टोलीबीच शनिबार राती भएको वार्तापछि ८ बुँदे सहमति भएको हो । सहमतिपछि डा केसीले आइतबार बिहान २८ औँ दिनमा अनसन तोड्नेछन् ।

शुक्रबार र शनिबार दिनभर आन्तरिक तथा द्विपक्षीय गृहकार्यमा रहेका दुवै पक्षका वार्ता टोली शनिबार राती अबेर मात्र सहमतिमा पुग्न समर्थ भएका हुन् ।

बिहीबार नै सहमतिनजिक भएको भनिएको वार्ता शुक्रबार बेलुकी भने दुवै पक्ष एकाएक आक्रामक बनेका थिए । शुक्रबार सहमतिनजिक पुगेर वार्ता भाँडिएपछि डा केसी पक्षले आन्दोलनका कार्यक्रम सार्वजनिक गरिसकेको थियो ।

सहमतिअनुसार आउँदो शैक्षिक सत्रदेखि कर्णाली स्वास्थ्य विज्ञान प्रतिष्ठान जुम्लामा एमबीबीएसका कार्यक्रमको पठनपाठन गरिनेछ ।

कैलालीको गेटामा पनि मेडिकल कलेज स्थापना गरी २०८० भित्रै एमबीबीएस पढाइ थाल्न पनि सरकारी पक्ष राजी भएको छ ।

एकीकृत स्वास्थ्य विज्ञान प्रतिष्ठान विधेयक आगामी हिउँदे अधिवेशनमा संसदमा पेस गर्न पनि सरकारले प्रतिबद्धता जनाएको छ ।

अन्य स्वास्थ्य विज्ञान प्रतिष्ठानमा पनि पर्याप्त बजेट व्यवस्था गर्ने, चिकित्सा अध्यापन थाल्ने लगायतका सहमति पनि सरकारले केसीसँग गरेको छ ।

बयलपाटा अस्पतालमा निःशुल्क सेवाको व्यवस्था गर्ने, पीसीआर परीक्षण र कोभिड उपचारका लागि सरकारी अस्पतालहरुको क्षमता विस्तार गर्ने प्रतिबद्धता पनि सरकारले जनाएको छ ।

तर पीसीआर परीक्षण निःशुल्क गर्न भने सरकारले मानेको छैन । जबकि सर्वोच्च अदालतले नै निःशुल्क परीक्षणको व्यवस्था गर्न सरकारका नाममा परमादेश जारी गरिसकेको छ ।

  • प्रकाशित मिति : असोज २५, २०७७, आइतवार ०१:१४ बजे

प्रकाशक

गृहनगर पब्लिकेसन प्रा.लि.,भरतपुर ,चितवन ,नेपाल.

फोन :- ९७७-५६५९४४४०

ईमेलः khabarmuluk@gmail.com

सूचना तथा प्रसारण बिभाग दर्ता नं.२०३७/०७७-७८