खरिद बिक्री भएका एनसेलका शेयर दर्ता नगर्न उच्च अदालतको अन्तरिम आदेश

मंसिर २१, २०८०

उच्च अदालत पाटनले खरिद बिक्री भएका एनसेलका शेयरहरू दर्ता किताबमा दर्ता नगर्न अन्तरकालीन अन्तरिम आदेश दिएको छ ।

न्यायाधीश पुरुषोत्तम ढकालको एकल इजलासले बिक्री भएका शेयरहरू दर्ता किताबमा दर्ता नगर्नरनगराउन कम्पनी रजिस्ट्रारको कार्यालय त्रिपुरेश्वरको नाममा बिहीवार अन्तरकालीन अन्तरिम आदेश जारी गरेको हो ।

अन्तरिम आदेशलाई निरन्तरता दिनु पर्ने या नपर्ने भन्ने विषयमा २५ गते छलफलमा उपस्थित हुन अदालतले भनेको छ । एनसेलको बिक्री रोक्न माग गर्दै गोकुलबहादुर रोकायाले उच्च अदालत पाटनमा रिट दायर गरेका थिए । ​

मलेसियन कम्पनी आजियाटाले बेचेको एनसेलको शेयर सतिशलाल आचार्यको कम्पनीले किनेको थियो ।

एनसेल बिक्री सम्बन्धमा छानबिन गर्न सरकारले बिहीवार नै पूर्व महालेखा परीक्षक टंकमणि शर्माको संयोजकत्वका उच्चस्तरीय छानबिन समिति गठन गरेको छ ।