विदेशमा अध्ययनरत नेपाली विद्यार्थीद्वारा छात्रवृत्तिका लागि सहयोग

पुस २८,२०७८

मेचीनगरको धुलावारी माध्यमिक विद्यालयलाई विदेशमा अध्यययनरत नेपाली विद्यार्थीले गाँस कटाएर छात्रवृत्ति रकम पठाएका छन् ।

कक्षा १ देखि १२ सम्म अध्ययन गरिरहेका विपन्न समुदायका ३९ विद्यार्थीलाई छात्रवृत्ति उपलब्ध गराउन अमेरिका र युरोपमा अध्ययनरत नेपाली विद्यार्थीले किन्जल फाउण्डेशन नेपालमार्फत सहयोग पठाएका हुन् ।

फाउण्डेशनमार्फत रु तीन लाख १६ हजार ५०० रकम मङ्गलबार विद्यालयको बैंक खातामा जम्मा भएको प्रधानाध्यापक महेन्द्रविलाश लुइँटेलले जानकारी दिए । फाउण्डेशन र विद्यालयबीच मङ्गलबार एक समारोहबीच छात्रवृत्ति वितरण गर्ने सम्बन्धमा औपचारिक सम्झौता भएको छ । फाउण्डेशनका संयोजक आशिष लामिछाने र विद्यालयका प्रधानाध्यापक लुइँटेलले सम्झौतापत्रमा हस्ताक्षर गरेका छन ।

फाउण्डेशनका संयोजक लामिछानेले आर्थिक अभावले पढाइ छाड्न लागेका विपन्न समुदायका विद्यार्थीलाई अध्ययनमा आर्थिक सहयोग पुर्‍याउन अमेरिका र युरोपमा अध्यययनरत नेपाली विद्यार्थीले गाँस कटाएर पठाएको छात्रवृत्ति रकमको सदुपयोग गर्न विद्यालयलाई आग्रह गरेका छन । दाताबाट प्राप्त सो रकम विद्यालयको खातामा जम्मा गरिदिएको र छात्रवृत्तिका लागि छनोट भएका विद्यार्थीको शैक्षिक आवश्यकतानुसार सहयोग रकम उपलब्ध गराइने सहमति भएको फाउण्डेशनका व्यवस्थापक हरि दाहालले जानकारी दिए ।

विद्यालयका सहप्रधानाध्यापक तेजप्रसाद चम्लागाईँका अनुसार सम्झौताबमोजिम कक्षा १ देखि ५ सम्मका विद्यार्थीले वार्षिकरूपमा रु पाँच हजार ८००, कक्षा ६ देखि ८ सम्मका विद्यार्थीले रु आठ हजार ४५० र कक्षा ९ देखि १२ सम्मका विद्यार्थीले रु ११ हजार ६०० छात्रवृत्ति पाउने भएका छन् । विद्यार्थीले छात्रवृत्तिवापत के–कस्तो सहयोग प्राप्त गरे भन्ने प्रतिवेदन विद्यालयले हरेक तीन महिनामा फाउण्डेशनलाई बुझाउनुपर्ने सम्झौतामा उल्लेख छ ।रासस