ग्रामीण क्षेत्रमा भन्दा सहरी क्षेत्रमा जनगणना गर्न कठिनाई भएको गणक तथा सुपरीवेक्षकहरुले बताइरहेका थिए । बारिहबाट आई डेरामा बसोवास गर्दै आएका तथा सहरका स्थानीयले पनि वास्तविक विवरण दिनलाई आनकानी गरेको बुझियो । यसले गर्दा अहिले पनि वास्तविक तथ्याङ्क आउला नै भनेर एकीन गर्न भने सकिने अवस्था छैन ।
केपी शर्मा- मंसिर १६, २०७८
चितवन । जनगणना २०७८ सकिएसँगै जिल्लाका स्थानीय जनगणना कार्यालयहरु बन्द भएका छन् । केन्द्रीय तथ्याङ्क विभागको निर्देशन अनुसार गत भदौ २५ गते स्थापना गरिएका ती कार्यालयहरु यही मंसिर १५गतसम्म संचालनमा आएर बन्द भएका हुन् ।
जनगणना २०७८ का लागि चितवनमा ७ वटा स्थानीय जनगणना कार्यालयहरु स्थापना गरिएका थिए । जस अन्तर्गत भरतपुर महानरपालिकामा मात्रै तीन वटा कार्यालयहरु स्थापना गरिएको थियो । भरतपुर १०, भरतपुर ६ को गितानगार र भरतपुर २० को नयाँ बजारमा ती कार्यालयहरु रहेका थिए ।
त्यस्तै माडी, टाँडी, भण्डारा र कालिकामा समेत स्थानीय जनगणना कार्यालयहरु रहेका थिए । ती मध्ये भण्डारामा रहेको कार्यालयले राप्ती र खैरहनीको गणना गरेको थियो भने कालिकाको रेडक्रस ग्राममा रहेको कार्यालयले कालिका सहित इच्छाकामना गाउँपालिकाको समेत तथ्याङ्क संकलन गरेको थियो ।
भरतपुुर १० मा रहेको जिल्ला जनगणना कार्यालय भने यही मंसिर मसान्त सम्म संचालनमा रही बन्द गरिनेछ । यस वर्षको १२ औँ राष्ट्रिय जनगणनामा चितवनमा २१० जना सुपरीवेक्षक र ८६७ जना गणकहरुलाई परिचालन गरिएको थियो । उनीहरुले जिल्लाका ९८ वटै वडाबाट तथ्याङ्क संकलन गरी जिल्लामा बुझाइसकेका छन् ।
जिल्ला जनगणना अधिकारी यज्ञमुर्ति भण्डारीका अनुसार राप्तीको १० देखि १३ नम्वर वडा र इच्छाकामनाका केही स्थानहरुमा भौगोलिक कठिनाइका कारण समस्या आएको थियो । तर ती क्षेत्रहरुमा पनि समयमै जनगणना सम्पन्न भएको उनले बताए । बन्द भएका स्थानीय जनगणना कार्यालयहरुले गणक तथा सुपरीवेक्षकहरुले संकलन गरेका फाराम तथा वाँकी रहेका सामाग्रीहरु जिल्ला जनगणना कार्यालयमा पठाइसकेका छन् ।
मंसिरको २५ गतेभित्रमा जिल्ला जनगणना कार्यालयले संकलित भएका ती विवरणहरुलाई वडाअनुसार छुट्टाछुट्टै राखेर केन्द्रीय तथ्याङ्क विभागमा पठाइसक्ने छ ।
संस्थागत रुपमा वसोवास गर्दै आएका परिवारलाई (प्रहरी, सशस्त्र र नेपाली सेना) गणना गर्नका लागि नेपाल प्रहरीका ४ जना, सशस्त्रका २ जना र नेपाली सेनाका ४ जना गरी १० जनालाई काजमा ल्याएर गणना कार्य सफल पारेको भण्डारीले बताए ।
भण्डारीका अनुसार भारतीय भूमि प्रयोग गरेर जानुपर्ने माडी नगरपालिका १ बाल्मिकी आश्रममा समेत सहजै गएर जनगणना गरिएको छ । उक्त ठाउँमा जम्मा १० परिवार रहेको उनले बताए । तर गणना चितवनमा भएपनि सो क्षेत्रमा बसोवास गरेका नागरिकहरुले प्रशासनिक काम भने नवलपुरको विनयीत्रिवेणी गाउँपालिका मार्फत गर्दै आएका छन् ।
निकुञ्ज क्षेत्रमा समेत बसोवास गर्ने उनीहरुले न चितवन न नवलपुरबाट विकास निर्माणको अनुभूति गर्न पाएका छन् । उनीहरुले शुद्ध पिउने पानी समेत नपाएको गुनासो गरेका थिए ।
जनगणना समाप्त भएको तीन महिनाभित्रमा अर्थात फागुन मसान्त सम्ममा प्रारम्भिक नतिजा सार्वजनिक हुने प्रावधान रहेको छ । जिल्लाबाट भने संकलित विवरण पठाइसकेपछि वाँकी रहेको सम्पूर्ण कार्यहरु तथ्याङ्क विभागबाटै सार्वजनिक हुनेछ ।
राष्ट्रिय जनगणना २०६८ को तथ्याङ्क अनुसार चितवनमा १ लाख ३२ हजार ४६२ घरपरिवार रहेका थिए । ती घरपरिवार भित्र ५ लाख ७९ हजार ९८४ जना मानिसहरु रहेका तथ्याङ्कले देखाएको थियो । जसमध्ये पुरुषको संख्या २ लाख ७९ हजार ८७ र महिलाको संख्या ३ लाख ८९७ जना रहेका थिए । यो पटकको जनगणनामा यो संख्या बढ्ने अनुमान गरिएको छ । जसअनुसार करिव ७ लाख पुग्ने बताइएको छ ।
गृहनगर पब्लिकेसन प्रा.लि.,भरतपुर ,चितवन ,नेपाल.
फोन :- ९७७-५६५९४४४०
ईमेलः khabarmuluk@gmail.com
सूचना तथा प्रसारण बिभाग दर्ता नं.२०३७/०७७-७८