यस पटकको चितवन महोत्सवले मेड इन नेपालको अवधारणा ल्याएर नेपालमै उत्पादन भएका वस्तुहरुलाई बजारमा चिनाउने लक्ष्य राखिएकाले सधेँ भन्दा यो महोत्सव महत्वपूर्ण हुनेछ ।
केपी शर्मा- मंसिर ३, २०७८ ।
गत वर्ष स्थगित भएको चितवन महोत्सव यो वर्ष हुने निश्चित भएको छ । उद्योग वाणिज्य संघ चितवनको आयोजना र भरतपुर महानगरपालिका , जिल्ला समन्वय समितिको प्रवद्र्धनमा महोत्सव हुने भएको हो ।
कोरोना महामारीका कारण २०७७ सालमा भइसक्नुपर्ने महोत्सव एक वर्ष पछि धकेलिएसँगै आउँदो पौष २५ गतेदेखि माघ ४ गतेसम्म नारायणी नदी किनारमा आयोजना हुनेछ ।
विश्वव्यापी रुपमा फैलिएको कोरोना महामारीमा कमीआएपनि पूर्णरुपमा नसकिएको हुँदा यस पटकको महोत्सवमा स्टल संख्या कम गरी परिसरलाई खुल्ला रुपमा राखिने आयोजकले जनाएका छन् ।
१३औँ संस्करणमा आइपुग्दा आयोजकले नेपालमा उत्पादन भएका वस्तुहरुलाई प्राथमिकता दिइने गरी ‘मेड इन नेपाल’ भन्ने छुट्टै परिसर समेत राखिने चितवन महोत्सवका मूल संयोजक राजु श्रेष्ठले जानकारी दिए । उनले भने,“महामारी यथवात रहेकाले सावधानी अपनाउदै परिसरलाई खुलमखुल्ला राख्नेगरी ३५० मात्रै स्टल रहनेछ ।त्यसमा चार वटा विशेष प्रकारका स्टल र डोमहरु पनि समावेश गरिएका छन् । ”
सदाझैँ लघु, घरेलु तथा साना उद्योगबाट उत्पादीत विभिन्न वस्तुहरु, हस्तकलाका सामाग्री,पोल्ट्रीपरिसर, अटो, बैँक तथा वित्तीय लगायतका स्टलहरु रहनेछन् । विशेषगरी नेपाली खानालाई प्राथमिकतामा राखेर हुँदै आएको फुड फेस्टीवललाई यस पटक पनि निरन्तरता दिइएको छ । पौष २८ गतेदेखि माघ २ सम्म फुड फेस्टीवल नारायणगढको क्याम्पा चौरमा विविधि सांस्कृति कार्यक्रम सहित संचालन हुनेछ ।
कोभिडले सवैभन्दा बढि असर पारेको क्षेत्र पर्यटनलाई केन्द्रविन्दुमा राखेर महोत्सव हुने र १० दिन चल्ने महोत्सवमा करिव ५ लाख आन्तरिक तथा वाह्य पर्यटकले अवलोकन गर्ने अनुमान गरिएको छ । उक्त अवधिमा २५ करोड भन्दा बढी कारोवार हुने अपेक्षा गरिएको छ ।
महोत्सवले चितवन जिल्लाको कृषि,शिक्षा,स्वास्थ्य, पर्यटन लगायत समग्र आर्थिक,सामाजिक र सांस्कृतिक विकासमा यसले टेवा पुर्याउने र यहाँ उत्पादीत वस्तुको बजारीकरणमा समेत टेवा पुग्ने श्रेष्ठको भनाई छ ।
कोरोनाविरुद्धको खोप समेत धेरैले लगाएका कारण महोत्सवमा अझ बढी दर्शकको उपस्थिती हुने अपेक्षा अयोजकले गरेका छन् । सर्वसाधरणका लागि रु. ५० र विद्यार्थीका लागि रु. २५ को टिकट दर कायम गरिएको छ भने ज्यष्ठ नागरिक, एकल महिला, शहिद परिवारका लागि परिचय पत्रका आधारमा निःशुल्क प्रवेशको व्यवस्था मिलाइएको आयोजकले बताएको छ ।
महोत्सव सफल पार्न आयोजकले मूल समिति,सल्लाहाकार समिति, स्टेरिङ समिति र विभिन्न गतिविधिमा केन्द्रीत ३० वटा कार्यागत समिति समेत गठन गरेको छ ।
पर्यटकीय नगरी तथा कृषिमा आत्मनिर्भर चितवन जिल्लाको गौरव, गरिमा र प्रतिष्ठाको साझा अभियानको रुपमा लिने गरिएको चितवन महोत्सव भव्यताका साथ सम्पन्न गर्न सवैमा आयोजकले अनुरोध गरेका छन् ।
गृहनगर पब्लिकेसन प्रा.लि.,भरतपुर ,चितवन ,नेपाल.
फोन :- ९७७-५६५९४४४०
ईमेलः khabarmuluk@gmail.com
सूचना तथा प्रसारण बिभाग दर्ता नं.२०३७/०७७-७८