दैनिक एक हजार यात्रुको आवतजावत हुने भरतपुर विमानस्थल ठप्प रहदा यात्रुलाई मार पर्ने त छँदै छ आर्थिक रुपमा पनि विमानस्थल र विमान कम्पनीहरु मारमा परेका छन् । समग्रमा यो मार भने मानविय गल्तीका कारण भएको प्रष्ट छ । जंगलमा लगाइएको डढेलोको कारण मौसममा खरावी आएको विज्ञहरुले बताउँदै आएका छन् ।
केपी शर्मा, चैत १६, २०७७
चितवन । विगत चार दिनदेखि भरतपुर विमानस्थलमा उडान हुन सकेको छैन । उडान ठप्प हुँदा विमानस्थल र विमान कम्पनीलाइ एक करोड भन्दा बढि घाटा भएको छ । भरतपुरबाट दैनिक १५ वटा उडानहरु हुने गरेका छन् ।
तर बनजंगलमा लागेको डढेलोका कारण देशभरनै आकाशमा तुँवालोले ढाकेपछि भिजिविलिटी कमजोर हुँदा उडान प्रभावित भएको हो । यही चैत १३ गतेदेखि उडान पुरै ठप्प भएको हो ।
चितवनबाट बुद्ध एयरले काठमाण्डौका लागि दैनिक ८ र पोखरा एक गरी कुल ९ वटा उडान भर्दै आएको छ । यता यती एअरलाइन्सले भने काठमाण्डौका लागि मात्रै दैनिक ५ वटा उडान भर्ने गरेको छ । यसरी दैनिक १५ वटा उडानबाट एकातर्फी करिव पाँच सय जना यात्रुहरु प्रभावित भएका छन् ।
दुईतर्फी गरी करिव १ हजार यात्रुहरुले उडान गर्न नपाउँदा भरतपुर नागरीक उड्यन कार्यालयलाई दैनिक १ लाख १५ हजार रुपैया घाटा भएको छ । दुवैतर्फ गर्दा दैनिक कुल २ लाख ३० हजार घाटा हुन जान्छ ।
चार दिन सम्म विमानस्थलमा उडान हुन नसक्दा भरतपुर नागरीक उड्यनलाई मात्रै रु. ४ लाख ६० हजार रुपैया घाटा भएको देखिन्छ भने दुवै तर्फ गरी कुल ९ लाख २० हजार आम्दानी गुम्न पुगेको छ ।
यता विमान कम्पनीहरुलाई पनि दैनिक २८ लाख रुपैया घाटा भएको देखिन्छ । दुईतर्फी गरेर दैनिक एक हजारको हाराहारीमा यात्रुहरुले भरतपुर विमानस्थल प्रयोग गर्दा सो घाटा हुन पुगेको हो ।
भरतपुरबाट काठमाण्डौका लागि प्रति यात्रुले सरदर २ हजार ८ सय तिर्नुपर्ने हुन्छ । यसरी भरतपुरबाट जाने र भरतपुरसम्म आउने एक हजार यात्रुको २८ लाख रुपैया दैनिक कारोवार हुने गर्दछ । चार दिन सम्म विमानस्थल वन्द हुँदा १ करोड १२ लाख रुपैया विमान कम्पनीहरुले मात्रै गुमाउन पुगेका छन् ।
यसरी हेर्दा चार दिनको अवधिमा विमानस्थलले र विमान कम्पनीहरुले गरेर करिव १ करोड २१ लाख ६० हजार रुपैया घाटा भइरहेको हो ।
भरतपुर विमानस्थल प्रमुख योगेन्द्र कुँवरले भने,“ देशको अर्थतन्त्रमा हवाई क्षेत्रले ठूलो योगदान दिइरहेको छ । तर प्राकृतिक कारणबाट यसरी क्षती हुँदा कोरोनापछि तङ्ग्रीदै गरेको अर्थतन्त्रमा यसले असर गरेको छ । ”
आकाशमा देखिएको तुँवालो कहिले सम्म हट्ने हो निश्चित नहुँदा विमान कम्पनीहरुले पर्याप्त टिकट काट्न पाएका छैनन् । यात्रुहरु कहिले विमानस्थल खुल्छ भनेर एकीन नहुँदा एअरलाइन्स कम्पनीसम्म कमै मात्रामा पुग्ने गरेका छन् । तर विमान कम्पनीहरुले भने उडान खुल्ने आशमा दैनिक अग्रिम टिकटहरु भने काटिरहेको बताएका छन् ।
गृहनगर पब्लिकेसन प्रा.लि.,भरतपुर ,चितवन ,नेपाल.
फोन :- ९७७-५६५९४४४०
ईमेलः khabarmuluk@gmail.com
सूचना तथा प्रसारण बिभाग दर्ता नं.२०३७/०७७-७८