निवार्चनको तयारीमा जुट्दै निर्वाचन आयोग चितवन

  • माघ ०८, २०७७

सरकारले निर्वाचन मिति घोषणा गरेपनि संसद विघटनविरुद्धको मुद्दा अदालतमा विचाराधीन रहेको छ । कछुवा गतिमा सुनुवाई भइरहेको उक्त मुद्दाको टुँगो लाग्न अझै लामै समय लाग्ने अनुमान लगाउन सकिन्छ । त्यहि पनि अदालतको निर्णय के आउँछ त्यसमा चुनाव हुन्छकी हुँदैन भन्ने कुरा निर्णीत रहन्छ ।

केपी शर्मा–माघ ८, २०७७
चितवन । सरकारले वैशाख १७ र २७ गतेलाइ तोकेको मध्यावधि निर्वाचनको तयारीमा निर्वाचन आयोग जुटेको छ ।

गत पुष ५ गते प्रतिनिधि सभा विघटन गरी केपी शर्मा ओली नेतृत्वको सरकारले मध्यावधि निर्वाचनको घोषणा गरेपछि जिल्ला निर्वाचन कार्यालय चितवन पनि निर्वाचनको तयारीमा जुटेको हो ।

बुधवार जिल्ला प्रशासन कार्यालय चितवनमा प्रमुख जिल्ला अधिकारी नारायण प्रसाद भट्टराइको अध्यक्षतामा जिल्लामा क्रियाशील राजनीतिक दल लगायत सरोकारवालाहरुसँग छलफल समेत भएको जिल्ला निर्वाचन कार्यालयका प्रमुख जनार्दन अधिकारीले बताए ।

उनका अनुसार राजनीतिक दल तथा सरोकारवालाहरुसँग छलफल गरेर मतदान स्थलको विषयमा टुँगो लागेको छ । २०७४ सालमा कायम भएका १६१ वटा मतदानस्थल र ४०८ वटा मतदान केन्द्रलाई नै यथावत राखिने अधिकारीले जनाए । तर ती मध्ये केही मतदान स्थलको नाम मात्रै परिवर्तन हुन सक्ने र मतदान केन्द्र बढ्न सक्ने उनले जनाए ।

पहिला भएको चुनावमा १ लाख ८४ हजार ६९ महिला, १ लाख ६९ हजार ९६५ पुरुष र १ जना तेस्रो लिँगी गरी चितवनमा ३ लाख ५४ हजार ३५ जना मतदाताहरु रहेका छन् । यी वाहेक करिव २० हजार जनाले निर्वाचन कार्यालयमा नाम दर्ता गराएका छन् । तर नाम दर्ता गराएका सवैले मतदानमा भाग लिन नपाउने अधिकारी बताउँछन् । उनले भने,“१६ वर्षमा नागरिकता लिन्छन् र नाम दर्ता गराउन आउँछन् । तर १८ वर्ष पुगेकालाई मात्रै हामीले मतदानमा सामेल गराउँछौँ ।”

यही पौष ६ गतेबाट मतदाता नामावली सार्न र नयाँ थप्न बन्द गरिएको छ । अघिल्लो चुनावमा भएका मतदाता बाट नयाँ कति थपिए भन्ने भन्नेवारे एकीन हुन अझै केही दिन लाग्ने उनले बताए ।

  • प्रकाशित मिति:माघ ०८, २०७७

प्रकाशक

गृहनगर पब्लिकेसन प्रा.लि.,भरतपुर ,चितवन ,नेपाल.

फोन :- ९७७-५६५९४४४०

ईमेलः [email protected]

सूचना तथा प्रसारण बिभाग दर्ता नं.२०३७/०७७-७८