केन्द्रको बाछिटा हेटौँडासम्म, मुख्यमन्त्री पौडेल धरापमा

उनीहरुले सवा एघार बजे प्रदेश सभा सचिवालयमा अविश्वासको प्रस्ताव दर्ता गराएका हुन् ।

पौष १०,२०७७
हेटौँडा । पछिल्लो समय नेकपाको केन्द्रमा देखिएको राजनीतिक ध्रुवीकरणको बाछिटा पनि प्रदेश सरकारमा पनि पर्न थालेको छ । शुक्रवार वागमती प्रदेशका मुख्यमन्त्री विरुद्ध अविश्वासको प्रस्ताव दर्ता भएको छ ।
दाहाल– नेपाल पक्षिय समूहका ४५ जना प्रदेशसभाका सदस्यहरुले सामुहिक रुपमा मुख्यमन्त्री डोरमणी पौडेलविरुद्ध अविश्वासको प्रस्ताव दर्ता गराएका हुन् । उनीहरुले अष्टलक्ष्मी शाक्यलाई प्रदेश सम्हाल्न प्रस्ताव गरेका छन् ।
साथै शुक्रवार नै वागमती प्रदेशका तीन जना मन्त्रीले राजीनामा दिएका छन् । आन्तरिक मामिला तथा कानुन मन्त्री सालिकराम जमरकट्टेल, सामाजिक विकासमन्त्री युवराज दुलाल तथा उद्योग पर्यटन वन तथा वातावरण मन्त्री अरुण नेपालले राजीनामा दिएका हुन् ।

पुस ५ गते संसद् विघटन भएपछि त्यस विरुद्ध नेकपामै दुई गुट देखिएका छन् । त्यसको असर केन्द्रदेखि प्रदेशसम्म पर्न थालेको छ ।

हिसाब यस्तो छ

एक सय १० सदस्यीय वागमती प्रदेश सभामा बहुमतका लागि ५६ जनाको आवश्यकता पर्छ । प्रचण्ड–नेपाल पक्षमा ४६ जना देखिएकाले उनीहरू मात्रले नयाँ सरकार बनाउन नसक्ने देखिन्छ ।

प्रदेश सभामा नेकपाका ८० जना छन् । प्रमुख प्रतिपक्षी दल नेपाली कांग्रेसका २२, विवेकशील साझा दलका तीन, राप्रपाका दुई, नेमकिपा दुई र एक स्वतन्त्र सांसद छन् । नेकपाका ८० सांसदमध्ये ओली पक्षका ३४ जना सांसद छन् । प्रचण्ड–नेपाल पक्षका ४६ जना छन् ।

दुवै समूहलाई सरकार निर्माणका लागि प्रमुख प्रतिपक्षी दल कांग्रेसको साथ आवश्यक देखिएको छ। साना दलको मतले नयाँ सरकार गठन हुने सम्भावना नरहेकाले नयाँ सरकार गठनका लागि कांग्रेसको साथ अनिवार्य देखिएको छ ।

ओली पक्षका मुख्यमन्त्री पौडेल सरकार गठन भएदेखि नै अल्पमतमा छन् । तत्कालीन एमालेबाट प्रदेश संसदीय दलको निर्वाचनमा ओली पक्षका पौडेलले नेपाल पक्षकी अष्टलक्ष्मी शाक्यलाई दश मतले हराएर दलका नेता बनेका थिए । पौडेलले ३४ र शाक्यले २४ मत पाएका थिए ।