कोरोना संक्रमणबाट चितवनमा सय जनाको मृत्यु, २८६ निको हुन बाँकी

पौष ७, २०७७
चितवन । कोरोना संक्रमणका कारण चितवनमा एक सय जनाको मृत्यु भएको छ । जिल्लामा संक्रमितको कुल सख्या ६ हजार २४१ पुगेको छ भने हालसम्म ५ हजार ८ सय ५५ जना निको भएका छन् । अझै २८६ जना निको हुन वाँकी रहेको स्वास्थ्य कार्यालय चितवनले उपलब्ध गराएको तथ्याङ्कमा उल्लेख छ ।
स्वास्थ्य कार्यालय चितवनले दिएको जानकारी अनुसार भरतपुर महानगरपालिकामा मात्रै ६० जनाको मृत्यु भएको छ । जिल्लामा रहेका ७ वटा स्थानीय तहमध्ये सवैभन्दा धेरै संक्रमित पनि भरतपुर महानगरपालिकामै रहेका छन् । मंगलवार मात्रै थप ११ जनामा संक्रमण देखिएको महानगरपालिकामा हालसम्म संक्रमितको कुल सख्या ४ हजार ४४९ पुगेको छ । ४ हजार १ सय ६८ जना निको भएका छन् ।
त्यस्तै रत्ननगर नगरपालिकामा ७४५ संक्रमित रहेकोमा १३ जनाको मृत्यु भएको छ । नगरपालिकाका ७०२ जना निको भएर घर फर्किएका छन् । आज थप ३ जनामा संक्रमण पुष्टि भएको छ ।
खैरहनी नगरपालिकाका ३९६ संक्रमित भएकोमा ३७६ जना निको भएका छन् । कोरोना संक्रमणका कारण हालसम्म ९ जनाको मृत्यु भएको छ ।
यता राप्ती नगरपालिकामा हालसम्म ३०६ जना संक्रमित भएकोमा २९१ ज्ना निको भएका छन् । नगरपालिकाका ८ जनाको मृत्यु भएको छ । ७ जना निको हुन वाँकी छन् ।
कालिका नगरपालिकामा संक्रमितको कुल सख्या १८६ पुगेकोमा १७१ जना निको भइसकेका छन् । हालसम्म ८ जनाको मृत्यु भएको छ । ७ जना निको हुन वाँकी रहेका छन् । आज थप १ जनामा कोभिड १९ पुष्टि भएको छ ।
चितवनकै माडी नगरपालिकामा हालसम्म १२२ संक्रमित मध्ये ११२ जना निको भएका छन् । १ जनाको मृत्यु भएको छ भने ९ जना निको हुन वाँकी छन् । आज थप १ जनामा कोभिड १९ को संक्रमण पुष्टि भएको छ ।
जिल्लाको एक मात्रै गाउँपालिका इच्छाकामनामा ३७ जना संक्रमितमध्ये ३५ जना निको भइसकेका छन् । १ जनाको मृत्यु भएको छ । अव १ जना मात्रै निको हुन वाँकी रहेका छन् । आज थप १ जनामा कोरोना संक्रमण पुष्टि भएको छ ।
जिल्लामा आज सम्म ३६ हजार ८६० जनाको स्वाव संकलन गरी परीक्षण गरिएको छ । आजसम्म होम आइसोलेसनमा २५९ जना संक्रमित स्वास्थ्य लाभ गरिरहेका छन् भने संस्थागत आइसोलेसनमा रहेको सख्या २७ रहेको छ ।