चीनले पाँच दिनमा ९० लाख मानिसको परीक्षण गर्ने

  • असोज २७, २०७७

आश्विन–२७, २०७७

चीनको चिङ्डाओ नगरले पाँच दिन लगाएर आफ्ना सबै ९० लाख जनसङ्ख्याको कोरोनाभाइरस परीक्षण गर्ने भएको छ ।

विदेशबाट आएका कोरोनाभाइरस सङ्क्रमितहरूको उपचार गर्ने एउटा अस्पतालसँग सम्बन्ध भएका दर्जनौँ मानिसमा सङ्क्रमण देखिएपछि त्यहाँ ठूलो सङ्ख्यामा कोरोना भाइरस परीक्षण गर्न लागिएको हो ।

गएको मे महिनामा चीनले एक करोड १० लाख मानिस बसोबास गर्ने र यो विश्वव्यापी महामारीको केन्द्र ठानिएको वुहान सहरमा सम्पूर्ण जनसङ्ख्यामा यसैगरी कोरोना भाइरसको सामूहिक परीक्षण गरेको थियो ।

अहिले चीनमा कोरोनाभाइरस सङ्क्रमण लगभग नियन्त्रणमा आइसकेको बताइन्छ । तर संसारका अन्य धेरै देशमा कोरोना भाइरस तीव्र गतिमा बढिरहेको छ । उनीहरुले विभिन्न चरण र प्रकृतिका लकडाउनका व्यवस्थाहरू गरेका छन् ।

चीनको सामाजिक सञ्जालको वेबसाइट वेइबोमा राखिएको एउटा वक्तव्यमा चिङ्डाओ नगरको स्वास्थ्य आयोगले त्यहाँ छ जनामा नयाँ सङ्क्रमण र छ जना विना लक्षणका सङ्क्रमितहरू भेटिएका छन् । ती सबै सङ्क्रमितको सम्बन्ध एउटै अस्पतालसँग देखिएको सरकार सञ्चालित सञ्चार माध्यम ग्लोबल टाइम्सले जनाएको छ ।

अब कोरोना भाइरस सङ्क्रमणको सापेक्षित रूपमा सानो नै भएपनि नयाँ समूह अथवा क्लस्टर फेला परेमा उक्त इलाकामा सामूहिक परीक्षण गरिने नयाँ रणनीति चीनका अधिकारीहरूले बनाएका छन् ।

चीनको राष्ट्रिय स्वास्थ्य आयोगले सोमवार जनाएअनुसार “पाँच दिनभित्रै सम्पूर्ण सहरको परीक्षण गरिनेछ । “ सहरका स्वास्थ्यकर्मी र अस्पतालहरूमा नयाँ भर्ना भएका समेत गरी झन्डै १,१४,८६२ जनाको कोरोनाभाइरस परीक्षणपछि नेगेटिभ नतिजा आइसकेको चिङ्डाओको स्वास्थ्य आयोगले जनाएको छ ।

नयाँ सङ्क्रमितहरू चीनमा सुनौलो साप्ताहिक छुट्टी भनिने अवकाशको समयपछि देखा परेका छन् जुन समयमा करोडौँ मानिसहरूले देशभरि यात्रा गरेका थिए ।

यसअघि वुहानमा १० दिनमा एक करोड १० लाख मानिसमा कोरोनाभाइरस परीक्षण गरिएको चीनले जनाएको छ ।

तथ्य परीक्षण एकाइ रीयालिटी चेकले गरेको अनुमान अनुसार त्यस बेला त्यसरी परीक्षण गरिएकाहरूको सङ्ख्या ९० लाख हुनुपर्छ । त्यो सङ्ख्या पनि निकै ठूलो मानिन्छ । त्यस बेला कोरोनाभाइरस परीक्षणका लागि सयौँ परीक्षण केन्द्रहरू खुला गरिएका थिए र हजारौँ कर्मचारीहरू परिचालित भएका थिए । शारीरिक अपाङ्गता भएका, वयोवृद्ध र अन्य जोखिमपूर्ण समूहमा पर्नेहरूलाई तिनका घरमा नै गएर परीक्षण गरिएको थियो । – विविसिबाट

  • प्रकाशित मिति:असोज २७, २०७७

प्रकाशक

गृहनगर पब्लिकेसन प्रा.लि.,भरतपुर ,चितवन ,नेपाल.

फोन :- ९७७-५६५९४४४०

ईमेलः [email protected]

सूचना तथा प्रसारण बिभाग दर्ता नं.२०३७/०७७-७८