• वैशाख ८, २०८१, शनिवार Saturday, 20 April, 2024

कर्णालीबाट प्रचण्डमाथि प्रहार


कर्णालीबाट प्रचण्डमाथि प्रहार

आइतबार एकाएक कर्णाली प्रदेशका मुख्यमन्त्री महेन्द्रबहादुर शाहीविरुद्ध आफ्नै पार्टीका १८ सांसदले संसदीय दलमा अविश्वासको प्रस्ताव दर्ता गराए । संसदीय दलको नेताबाट नै हटाउने उनीहरुको तयारी छ ।

केन्द्रदेखि प्रदेशमा एकछत्र शासन गरिरहेको नेकपामा यो तहको विद्रोह होला भनेर अनुमान समेत कुनै नेता कार्यकर्ताले गरेका थिएनन् । किनभने, केन्द्रमा दुई अध्यक्षले पार्टी विभाजनको डिलबाट जोगाएर सहमतिउन्मुख गतिविधिको छनक दिइरहेका थिए ।

वास्तवमा कर्णाली प्रदेशका मुख्यमन्त्रीविरुद्धको विद्रोह भनेको केन्द्रमा पूर्वमाओवादी खेमाका अध्यक्ष पुष्पकमल दाहाल प्रचण्डविरुद्धको विद्रोह हो । किनभने, नेकपा नेतृत्वमा रहेका ६ वटा प्रदेश सरकारमध्ये कर्णाली सुदूरपश्चिममा पूर्वमाओवादीका मुख्यमन्त्री छन् ।

सुदूरपश्चिमका मुख्यमन्त्री त्रिलोचन भट्ट र केन्द्रका उद्योगमन्त्री लेखराज भट्टले प्रचण्डको साथ छाडिसकेका छन् । शाही प्रचण्डका विश्वासपात्र हुन् भने बाँकी सबै मुख्यमन्त्री प्रधानमन्त्री केपी शर्मा ओलीका ।

उता कर्णालीमा प्रचण्डपक्षीय नेता शाहीविरुद्ध विद्रोहको नेतृत्व ओलीपक्षी नेता यमलाल कँडेलले गरेका छन् । मुख्यमन्त्रीविरुद्ध हस्ताक्षर गर्नेमा १३ जना पूर्वएमालेका सांसद रहेका छन् भने ५ जना पूर्वमाओवादीका छन् ।

कर्णालीमा यस्तो समयमा पार्टीभित्रै विद्रोह भएको छ, जतिखेर केन्द्रमा प्रचण्डले ओलीलाई केन्द्रको मन्त्रिपरिषद हेरफेरदेखि प्रदेशका मुख्यमन्त्री परिवर्तनसम्मका लागि दबाब दिइरहेका छन् । स्थायी समिति र सचिवालय बैठकको आदेश यसको पृष्ठभूमिमा छ ।

यस्तो बेलामा ओलीले प्रचण्डलाई कर्णालीबाट झापड हानेका छन् । यसको अर्थ हो– अब ओली पक्षका नेताहरुको जिम्मेवारी हेरफेर हुने छैन । यदि यसो गरिएमा प्रचण्डलाई पार्टीभित्रैबाट पाखा लगाइनेछ र थप शक्तिहीन बनाइनेछ ।

यसअघि प्रचण्डले ओलीको शक्ति कमजोर पार्न केन्द्रमा माधव नेपाल, झलनाथ खनालदेखि वामदेव गौतमसम्मको सहयोग लिएका थिए । ओलीका विश्वासपात्र गोकुल बाँस्कोटा र युवराज खतिवडालाई मन्त्रिपरिषदबाट हटाउन सफल भएका थिए ।

झण्डझण्डै बहुमतको बलमा ओलीलाई नै सत्ताच्यूत गर्न खोजेका थिए । ओली मात्र होइन, राष्ट्रपतिदेखि मुख्यमन्त्रीहरु समेत फाल्ने योजना बाहिर आएको थियो । त्यहाँबाट बिच्किएका ओलीले प्रचण्डलाई कमजोर बनाउने प्रतिरोधी योजना अघि सारेको देखिन्छ ।

पूर्वमाओवादी आधार इलाका क्षेत्रबाटै प्रचण्डपक्षीय नेतामाथि ओली पक्षीय नेताको नेतृत्वमा भएको यो दबाब र प्रहारको धेरै ठूलो राजनीतिक अर्थ छ । ओली पक्षीय नेताको अगुवाइमा केही पूर्वमाओवादी मिसिनुले प्रचण्डमाथि थप खतराको घण्टी बजेको छ ।

  • प्रकाशित मिति : असोज २६, २०७७, सोमवार ०७:०९ बजे

प्रकाशक

गृहनगर पब्लिकेसन प्रा.लि.,भरतपुर ,चितवन ,नेपाल.

फोन :- ९७७-५६५९४४४०

ईमेलः khabarmuluk@gmail.com

सूचना तथा प्रसारण बिभाग दर्ता नं.२०३७/०७७-७८