तुइनखोलामा थप ठूलो पहिरो खस्यो, खुलाउन भोलि दिनभर लाग्ने अनुमान

मुग्लिन–नारायणगढ सडकखण्डको तुइनखोला पुलनजिकै थप ठूलो खसेको छ । मंगलबार (असोज ७ गते) अपराह्न ४:५५ मा ठूलो पहिरो खसेपछि सडक दुईतर्फी अवरुद्ध भएको सडक डिभिजन भरतपुरले जनाएको छ ।

डिभिजनका अनुसार, निरन्तर पहिरो खसिरहेकाले पन्छाउन समस्या भएको छ । डिभिजनले वैकल्पिक सडक प्रयोग गर्न आग्रह गरेको छ ।

पहिरोका कारण आज दिउँसो १ बजेदेखि नै सडक आवागमन दुवैतर्फ बन्द भएको थियो । अपराह्नतिर फेरि ठूलो पहिरो खसेको हो ।

यसअघि, गत शुक्रबार (असोज ३) साँझ खसेको पहिरोका कारण सवारी आवागमन दुवैतर्फ अवरुद्ध भएको थियो । त्यसको झन्डै ४५ घण्टापछि सडक एकतर्फीरूपमा सञ्चालनमा ल्याइएको थियो ।

तर, माथिबाट निरन्तर खसिरहेको सुक्खा पहिरोका कारण सडक आवागमन सहज हुन सकेको छैन । जसका कारण दसैँ मनाउन घर हिँडेका हजारौँ यात्री मर्कामा परेका छन् ।