व्यवस्था बदल्नेबाट नागरिकको अवस्था परिवर्तन हुन सकेन-पूर्वराजा ज्ञानेन्द्र

शाहले आफ्नो त्यागलाई कमजोरी नठान्न चेतावनी दिएका छन् । प्रजातन्त्र दिवसको पूर्वसन्ध्यामा मंगलबार भिडियो सन्देश जारी गर्दै शाहले राजगद्दी त्यागेको विषयलाई कमजोरी नठान्न दलहरूलाई चेतावनी दिएका हुन् ।

जनताको भलोका लागि आफूले ओहोदा र सुख सुविधा त्यागेको उनले बताएका छन् । शाहले नेपालको उन्नतिका लागि त्याग गरेको र जनहितमा अन्य कुरा पनि त्याग्न तयार रहेको भिडियोमा भनेका छन् ।

व्यवस्था बदल्नेबाट नागरिकको अवस्था परिवर्तन हुन नसकेको आरोप पनि शाहको छ । उनले राष्ट्र जोगाउन र राष्ट्रिय एकता कायम राख्न आफूलाई साथ दिन नागरिकलाई आह्वान पनि गरेका छन् ।

जनता र राजा मिलेर प्रजातन्त्रलाई सबल बनाउन लागि परेको इतिहास साक्षी रहेको उल्लेख गर्दै उनले प्रजातन्त्र आजको शासन पद्धतिमा उच्चतम पद्धति हुनुपर्ने र प्रजातन्त्रमा सबैको पहिचान र अस्तित्व हुनुपर्ने बताएका छन् ।

‘निषेधको दृष्टिकोण राख्ने राजनीतिले प्रजातन्त्रलाई बलियो बनाउँदैन,’ शाहले भिडियो वक्तव्यमा भनेका छन्,‘पक्ष विपक्षको अहंकार आ–आफ्नै खालको स्वार्थ तथा हठले पनि प्रजातन्त्रलाई गतिशील बनाउन सक्दैन ।’